عرسان الآنسه مروه
**************
عريس 2 : الاستاذ / حسن
***************
شخصيات الجزء الثانى:
___________
مروة : بطله القصه تعمل مدرسه تربيه موسيقيه , متمرده ولا تقبل بالزواج من أى شخص
عبد اللطيف : والد مروه .. على المعاش
إحسان : والدت مروة .. وربه منزل
ناديه : صديقه مروه فى العمل , مطلقه
حسن : مدرس لغه عربيه فى المدرسه التى تعمل بها مروه
----------------------------------
المنظر صباحاً فى المدرسه التى تعمل بها مروه
---------------------------------
ناديه : مالك يامروه فى ايه؟
مروه : ابداً ذى مشكله كل يوم , مانتى عارفه ماما ومشاكلى معاها
ناديه : آآآآآآه ... اكيد عريس , وطبعا رفضتى ذى برضه كل مره
مروه : طبعاً ماقولكيش , لما رفضته ماما عملت إيه؟ خناق فى البيت مع بابا لانه رائيه من رائى
ناديه : والله عندها حق وماتزعليش منى .. اصلك غريبه من ايام الكليه وانتى غير البنات صحابنا
مروه : هههههه يعنى اتجوز واحد بياخد اوامر من مامته .. ياسلام اقوله ناكل ايه انهارده يقولى اسالى ماما حبيبتى ؟ هههههه
ناديه : طيب يامروه , ماتشوفى الاستاذ حسن .. ده هيموت عليكى , وأظن انك تعرفيه وممكن تتكلمى معاه بعيد عن جو البيت والعيله
مروه :يعنى هروح اقوله تعالى لما اجوزك ههههههه او عشان ارضى ماما بجوازه والسلام؟
ناديه : لاء طبعاً ماقولناش كده بس هو قبل كده كلمنى عليكى وانا قولتله هى بتفكر , انا ممكن افتحله الموضوع بشكل دبلوماسى وربنا يسهل
مروه : طيب هفكر فى الموضوع ده
ناديه : تفكير ايه بس ؟ بقولك هيموت عليكى
----------------------
المنظر فى حديقه المدرسه
---------------------
ناديه : استاذ حسن
حسن : ايوه ياابله ناديه
ناديه : عامل ايه .. واخبارك ايه؟
حسن : تمام الحمد لله , انتى عامله ايه؟
ناديه : تمام , خلاص ياعم خلصتلك الموضوع بتاع مروه اللى كلمتنى فيه من شهرين
حسن : بجد !! ياااااااااااااااه اخيراً انا مش مصدق .. طيب اقدر اكلمها ؟
ناديه : طبعا .. هى فى مكتبها فوق اطلعلها .. سلام
-----------------
المنظر فى مكتب مروه
-----------------
حسن : ممكن ادخل ؟
مروه : اتفضل استاذ حسن
حسن : احم احم .. استاذه ناديه بلغتنى انك وافقتى بعرضى لكى بخصوص موضوع الجواز ؟
مروه : والله انا قولتلها افكر
حسن : مش مهم .. خدى راحتك وفكرى بس المهم انك اقتنعتى بعرضى عليكى .. بس إمتى هاخد منك الرد القاطع؟
مروه : ان شاء الله لبعد امتحان اخر السنه , وفى حفله انتهاء العام الدراسى
حسن : جميل .. انا منتظر ردك عليا
-----------------------
المنظر فى منزل عائله مروه
----------------------
إحسان : والله يابنتى كويس اهو منها زميلك فى الشغل واهو انتم تعرفوا بعض وربنا يسهل
مروه : وايه راى حضرتك يابابا ؟
عبد اللطيف : الراى رائيك يابنتى .. اكيد انت ادرى منى باخلاقه وتصرفاته
مروه : ربنا يسهل انا هدخل انام عشان الوقت اتاخر ولازم احضر الطابور الصبح بدرى .. تصبحوا على خير
إحسان : ربنا يهديكى للاخر يابنتى .. عشان ارتاح واطمن عليكى
---------------------
المنظر فى طابور المدرسه
--------------------
مروه : صباح الخير استاذ حسن
حسن : صباح النور .. والله ياابله مروه انا بظبط ساعتى على ميعادك .. انتى دقيقه فى مواعيد العمل جدا
مروه : الحمد لله الانسان بيعامل ربنا وضميره فى عمله
ناديه : صباح الخير ياجماعه
مروه : صباح النور ياناديه .. عامله ايه انهارده
حسن : صباح النور ايه الشياكه دى ياابله ناديه؟
ناديه : انا تمام الحمد لله انتم اخباركم ايه .. وميرسيه اوى يااستاذ حسن من ذوئك والله
مروه : طيب انا هروح اشوف الولاد عشان نشغل الطابور
----------------------------------------------------
وبعد مرور 3 شهور ... المنظر فى المدرسه فى حفله إنتهاء العام الدراسى
----------------------------------------------------
ناديه : ها هتقولى ايه لحسن ؟ انهارده الموعد المنتظر ههههههه
مروه : استنى بس ياناديه اخلص اللى فى ايدى
ناديه : انتى بتعملى ايه بس ؟
مروه : بكتب اخر قصه ليا عشان ابعتها لقراء مجله مشاكل حواء
ناديه : ههههههههههههههه وياترى عرفتى نهايتها ؟
مروه : للاسف لاء ... ومش عارفه اعمل ايه؟
ناديه : ربنا يستر وانهى القصه بئى بانك توافقى باستاذ حسن عشان تريحينا كلنا ونخلص
مروه : ان شاء الله
ناديه : مروه استاذ حسن جاى ناحيتنا انا همشى واسيبك معاه بس اهدى واكلمى بعقل بلاش فلسفه الله يخليكى سلام
حسن : سلام عليكم ابله مروه
مروه : وعليكم السلام اهلا استاذ حسن اتفضل
حسن : تمام .. بس انا ملاحظ حاجه غريبه ؟
مروه : ايه اللى ملاحظه؟
حسن : قاعده تكتبى والناس وانتى سرحانه وهيمانه والناس مفكره انه جواب غرامى ,ومن شويه رايحه جايه وسط الناس وبعدين لبسك ايه ده؟
مروه : نعم؟ ناس مين ورايحه جايه ايه ؟ ولبس ايه تقصد ايه بالكلام ده حضرتك؟
حسن :انا ماحبش انك تستعرضى قدام الناس ولا تلبسى كده , وبعدين ماتكتبيبش وانتى سرحانه كده المنظر مش حلو
مروه : انا لبسى محترم وانت مش هتعلمنى اعمل ايه , ثانيا انا مدرسه وست عامله والحركه عندى فى عملى وفى نطاق شغلى,واهم شىء انا بكتب لانى براسل كتاباتى لمجله, وانا مش اسمحلك اكتر من كده
حسن: بس انا ماحبش كده قولتلك
مروه : مايهمنيش انا عارفه انا بعمل ايه .. وانت ايه عشان تدخل فى حياتى بالشكل ده؟ وبعدين كل المدرسات بيتحركوا ذيى فى الحفله , وحتى ناديه لابسه شبيه للبس بتاعى
حسن : ماليش دعوه بالناس ولا بناديه دول عاملين عرض عشان الناس تتفرج , وناديه دى مطلقه لازم تلبس وتعمل كده عشان تشوفلها عريس , ودول نعاكس فيهم مش نرتبط بيهم
مروه : نعم . انا مش اسمحلك تسب فى زميلاتى بالشكل ده , انا مش شايفه ان فى شىء خارج , وبعدين اما انت متحفظ كده روح اجوز واحده من الريف , ليه بتتجوز من المدينه؟
حسن : انتى شايفه كده ؟
مروه : اكيد واظن انى صح .. وطلبك مرفوض انا ماتجوزش انسان ذيك ,عن إذنك انتهى الكلام .. سلام
----------------------
المنظر فى منزل عائله مروه
---------------------
إحسان :مالك يامروه ساكته من اول ماجيتى من الحفله؟
مروه: ابداً ياماما سلامتك مافيش حاجه
إحسان : طيب عملتى ايه مع استاذ حسن ؟
مروه : ولا حاجه ماينفعنيش
إحسان : بتقولى ايه؟ انتى هتجنينى معاكى والله ..ربنا يهديكى
مروه : هجنينك ليه ؟ عاوزانى اجوز وخلاص عشان قرايبك مايقولوش انى ماتجوزتش لحد دلوئت وشكلك قدامهم بس؟ ده كل اللى يهمك ياماما
عبد اللطيف : مالكم فى ايه صوتكم جايب للشارع؟
إحسان : شوف بنتك بتعلى صوتها عليا , وكمان رفضت استاذ حسن
عبد اللطيف : هى حره ياستى هى اللى هتتجوز وهى ادرى بيه مننا , وكل شىء قسمه ونصيب
إحسان : والله هتجنينونى
مروه : انا داخله انام يابابا تصبح على خير
إحسان : ماشى يامروه خليكى كده على طول , منا يهمنى شكلى قدام قرايبى بس اصلك مش بنتى بنت قريبتى
عبد اللطيف : وانتى من اهله يابنتى , اهدى بئى ياإحسان قدر الله ماشاء فعل .. اهدى
إحسان : ربى لااسالك رد القضاء ولكنى اسالك اللطف فيه
